Flutse
Woar is den tied dat er nog gin sproake was van cholesterol of Omega 3 en dat je koste eten wat da je wilde en hoevele da je wilde.
"Je moet veel eten voa kloek te stoan" was wat dan ze zeien. De menschen aten vele moa stoen doarom nie te dikke... ze werkten dadde of. Vele bewegienge en gezoende kost van moeder de vrouwe.
's Nuchtends spek met eiers en een poar sneen broad en een klekke beuter. Soms wast saleie deur moeder zelve gemakt en af en toe een stikstje sjokola. 's Noens vassche soepe, een hoop petatten, groensel en een stik vlees of vis. En 's avonds were stuuten met koas of charcuterieje. Voa te drienken een tasse kaffie ipgegoten in de kaffiezak. Een poar soeplepels kaffie, een bitje chicorije en loaten trekken ip de Leuvense stove. Surtout in de winter kost zukke tasse of komme kaffie deugd doen. Af en toe met een dreupel doar in...)
De vriedag wast visdag. En in de vasten ook de woensdag. De paster zei: vlees derven... Gin soepe moa kerrepap. Gin vlees moa kokvis. Een gulletje, een haerienk, ploate of een scharre. Da was noavolgens dat er soarten vis in de poander lagen. Omme an een zootje vis of een kluts vis kosten geroaken ton was 't eten wat de pot schaft, zoender vele complimenten.
De menschen aan nog gin allergies en van vegetariërs wast er nog gin sproake. Da zien allemolle uutviendiengen van den moderne tied. Ik meugen dit nie en 'k meugen da niet... je bluuft an toafel zitten toe da joen tallore uut is. 'K zeggen wel tallore want in de tied aten de menschen uut één tallore... gin diepen en een platten want da was voa 't riek volk. Deze aan tied (en personnel) voa vele schuttels te wasschen... zoender afwasmachine!
't Woaren de groensels van de tied van 't joar en gin vrimd tuug van an den andere kant van de wéreld. Respect voa 't leefmilieu zoender damme 't zelve wistn. En nu goan der een poar snotoapen zeggen oewe dat 't allemolle moet.
In de wienkel woaren der gin plastieken zakstjes. 't Was in 't gewichte en ton in de netzak of grote kabba. En de gazette voa WC-papier. Biena niemand at er een otto en oewe dat een vliegmachine der van binnen uut zag wisten we nie want ip reize goan da kenden we nie.
En toch wast vroeger gezellig, leute en... gezoend !